11 persona të akuzuar nga Uashingtoni për trafik droge u vranë pasi anijet ku ndodheshin u goditën nga avionët amerikanë.
Sipas deklaratës zyrtare, tre prej anijeve ndodheshin në Oqeanin Paqësor dhe një në Karaibe.
Komanda e përbashkët e forcave amerikane për Amerikën Latine dhe Karaibet njoftoi sulmet përmes platformës X.
Kjo fushatë bombardimesh ka nisur prej më shumë se gjashtë muajsh dhe deri tani ka lënë të paktën 140 të vrarë që nga shtatori.
Administrata Trump e justifikon operacionin si një përpjekje për të ndalur kartelet e drogës që transportojnë substanca të paligjshme drejt SHBA-së.
Megjithatë, ekspertët dhe figura politike në Uashington po e vënë në dyshim ligjshmërinë e fushatës, duke theksuar se nuk janë paraqitur prova të prekshme që anijet e goditura ishin të përfshira në trafik droge.
Komisioneri i Lartë i Kombeve të Bashkuara për të Drejtat e Njeriut e ka cilësuar këtë praktikë si “ekzekutime jashtëgjyqësore”, një vlerësim që gjen mbështetje edhe te shumë ekspertë ndërkombëtarë.
