Lëvizja BASHKË ka nisur një fushatë të re politike që përfshin protesta, takime bashkëbisedimi me qytetarët dhe nisma ligjore në Parlament.
Në një takim të zhvilluar me anëtarë dhe mbështetës, drejtues të saj prezantuan një platformë me propozime konkrete që, sipas tyre, synojnë adresimin e krizës politike dhe sociale në vend.
Me anë të një postimi në facebook, Lëvizja BASHKË bën me dije deputeti Redi Muçi, do të paraqesë një paketë ndryshimesh ligjore që kanë në fokus forcimin e luftës kundër korrupsionit, rritjen e transparencës në vendimmarrje dhe përmirësimin e situatës ekonomike të qytetarëve.
Platforma e prezantuar përfshin disa drejtime kryesore:
- Ndryshime në Kodin Penal për:
– rëndimin e dënimeve të korrupsionit aktiv dhe pasiv deri në 20 vite burg;
– heqjen e afateve të parashkrimit për veprat penale të korruptimit aktiv dhe pasiv të zyrtarëve të lartë të shtetit, sidomos për rastet e kapjes së shtetit (hartimit të ligjeve dhe akteve normative të porositura), si dhe të ndikimit të krimit të organizuar në vendimmarrjen shtetërore dhe veprimtaritë politike;
– rëndimin e dënimeve për krime zgjedhore deri në 10 vite burg.
- Forcimin e institucioneve që luftojnë korrupsionin dhe zhbërjen e kapjes së shtetit përmes:
– rritjes së kapaciteteve për hetimin, sekuestrimin dhe konfiskimin e pasurive të vendosura prej korrupsionit dhe krimit të organizuar;
– forcimit të mbrojtjes ligjore dhe masave të konfidencialitetit për sinjalizuesit e praktikave korruptive;
– abrogimit të ligjit për investimet strategjike.
- Ngritjen e komisioneve hetimore parlamentare për:
– koncesionet dhe përfituesit nga ligji për investimet strategjike.
– privatizimet e mëdha dhe tjetërsimin e pasurive dhe pronave publike.
- Ndryshimin e legjislacionit zgjedhor përmes:
– hartimit të një ligji të posaçëm për financimin e partive politike, duke pamundësuar financimin e tyre nga krimi i organizuar dhe oligarkia ekonomike;
– hartimit të një ligji që siguron gjurmimin e procesit ligjvënës dhe bën transparente çdo praktikë të ligjshme të ndikimit të vendimmarrjes nga grupet e interesit.
– ndalimit të përfshirjes në fushata zgjedhore të punonjësve të administratës publike, përveç rasteve kur janë vetë kandidatë.
- Mbështetjen ekonomike të qytetarëve përmes miratimit të ligjeve të:
– minimumit jetik;
– Statusit të Minatorit.
