Dy të rinj shqiptarë janë arrestuar në Ankona të Italisë, të dyshuar si pjesë e një rrjeti të trafikut të kokainës në qytet.
Operacioni u zhvillua nga Polizia di Stato në orët e vona të mbrëmjes dhe përfundoi në orët e para të mëngjesit. Sipas mediave italiane, oficerët e skuadrës mobile i kishin vënë në vëzhgim dy të rinjtë dhe i ndoqën teksa po lëviznin drejt një zone periferike.
Atje, ata u panë duke marrë diçka nga një vend i fshehur, veprim që ngriti dyshime dhe çoi në ndërhyrjen e policisë. Patrulla ndaloi automjetin e tyre dhe gjatë kontrollit u gjetën rreth 50 doza kokaine të gatshme për shitje.
Kontrolli vijoi në banesën e tyre, ku u sekuestruan sasi të tjera kokaine, pajisje për peshimin dhe paketimin e lëndës narkotike, si dhe rreth 4 mijë euro para të gatshme, të dyshuara si të ardhura nga aktiviteti i paligjshëm. Në total, policia bëri të ditur se janë sekuestruar rreth 200 gramë kokainë, me një vlerë tregu mbi 10 mijë euro.
