Safet Rustemi (Bajri) ka depozituar një kërkesë në Gjykatën Kushtetuese, ku kundërshton masën e sigurimit personal “Arrest me burg” të vendosur ndaj tij.
Në padinë e paraqitur, Bajri kërkon shfuqizimin si të papajtueshëm me Kushtetutën të tre vendimeve gjyqësore që kanë caktuar dhe lënë në fuqi masën e arrestit në burg teksa kërkon lirimin nga burgu.
Safet Bajri u arrestua nga forcat RENEA më 21 shkurt, pasi së bashku me Astmer Bilali dhe Behar Bajrin akuzohen për vrasjen e Fatbardh Licit.
Sipas SPAK ata dyshohen për kryerjen e veprave penale; “Vrasje me paramendim” kryer në formën e veçantë të bashkëpunimit, atë të grupit të strukturuar kriminal në dëm të viktimës Fatbardh Lici, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Fatbardh Lici u vra rreth shtatë vite më parë dhe dyshohet se ishte viktimë e përplasjes së vazhdueshme mes fiseve Lici dhe Bajri në Shkodër. Konflikti mes grupeve ka nisur që prej atentatit ndaj biznesmenit Lulzim Kulla në janar të vitit 2018 dhe ka vijuar me një seri vrasjesh dhe zhdukje personash në Shkodër.
Motivi i vrasjes së Fatbardh Licit dyshohet të lidhet me hakmarrjen ndaj Ibrahim Licit, i cili ishte fajësuar nga Behar Bajri për vrasjen e ish-efektivit Boran Bërçana dhe bashkëjetueses së tij Silva Ndoci.
