Policia e Tiranës ka arrestuar gazetarin Elio Laze 37-vjeç, i cili sipas njoftimit zyrtar akuzohet për gjobëvënie dhe shantazh.
Sipas Policisë, Laze akuzohet se shantazhoi një punonjës të administratës publike për t’i marrë 5000 euro në këmbim të fshirjes së disa artikujve që kishte postuar për të, në portalin që administronte, “Priza.al”.
Policia njoftoi gjithashtu se Lazes, iu gjetën me vete edhe shuma prej 5 mijë eurosh që i kishte kërkuar punonjësit të administratës..
“U kap në zyrën e subjektit, në Tiranë, menjëherë pasi mori 5000 euro nga i dëmtuari, dhe u vu në pranga shtetasi E. L., 37 vjeç. Ai dyshohet se nëpërmjet shantazhit, i ka marrë punonjësit të administratës publike, shumën e eurove, për të fshirë nga portali që administronte, disa shkrime që kishte postuar për të, në kohë të ndryshme”,- thuhet në njoftimin e Policisë.
Materialet procedurale iu referuan Prokurorisë së Tiranës, për veprime të mëtejshme, për veprat penale “Shtrëngimi me anë të kanosjes ose dhunës për dhënien e pasurisë” dhe “Mashtrimi”.
