Ilir Meta ka reaguar pasi avokatit i tij, Kujtim Cakrani u dhunua gjatë ditës së sotme nga dy persona në Vlorë.
Në postimin e tij në Facebook, Meta shkruan se kjo nuk është hera e parë që sulmohen avokatët, duke shtuar se autorët e sulmit duhet të vihen para drejtësisë sa më parë.
Avokati Cakrani ndodhet i shtruar në Spitalin Rajonal të Vlorës, në repartin e kirurgjisë, ku po merr trajtim mjekësor.
Ngjarja ndodhi në një pikë karburanti në Vlorë. Sipas deklarimit të vetë avokatit, ai është provokuar fillimisht nga dy të rinj dhe më pas është goditur nga pas me mjet prerës. Ai ka mohuar të ketë pasur konflikte të mëparshme me ta.
Postimi i plotë:
Dënoj me ashpërsi sulmin ndaj Avokatit Kujtim Cakrani nga dy banditë, të cilët jo vetëm duhet të identifikohen, por edhe të vendosen para ligjit sa më shpejt.
Nuk është hera e parë, që sulmohen avokatët sepse jetojmë në një regjim ku ata konsiderohen jo vetëm të panevojshëm, por edhe problematikë.
Solidaritetin tim të plotë me Avokatin Cakrani, me familjen e tij, si edhe me të gjithë kolegët!
