Në vitin 2019, emisioni zbuloi manipulimin e një tenderi për dezinsektimin e Bregdetit të Shqipërisë, i cili u anulua pas publikimit.
Megjithatë, në vitin 2020 shërbimi u tenderua sërish dhe fitues u shpall kompania NRG, në pronësi të një shtetasi italian.
Për periudhën 2020–2021, NRG përfitoi rreth 1.3 milionë euro për dezinsektimin e gjithë bregdetit shqiptar, ndërsa në vitin 2022 fitoi edhe një tender tjetër në Bashkinë Divjakë me vlerë 120 mijë euro. Në total, brenda tre vitesh, kompania mori rreth 1.4 milionë euro fonde publike për të njëjtin shërbim.
Investigimi i “Stop” ngriti dyshime serioze mbi kryerjen reale të dezinsektimit.
Sipas rregullave dhe kontratave, për këto shërbime duhej të përdoreshin biocide të caktuara, të cilat importohen në Shqipëri vetëm nga NRG.
Të dhënat zyrtare të Doganave tregojnë se nga viti 2019 deri në 2023 kompania ka importuar vetëm 5,267 kg biocid, ndërkohë që vetëm për kontratat e Bregdetit dhe Divjakës parashikohej përdorimi i mbi 16 mijë kg. Kjo krijon një mungesë prej rreth 10,869 kg biocid, që sipas ekspertëve nuk mund të justifikohet.
“Stop” zbuloi gjithashtu se NRG kishte pasur probleme të ngjashme edhe më parë.
Në vitin 2015, ISHP kërkoi kthimin e fondeve për mospërmbushje kontrate, por çështja u mbyll në favor të kompanisë në gjykatë.
Në emër të interesit publik, emisioni STOP dhe juristi Arben Llangozi kanë depozituar një kallëzim penal në SPAK, duke kërkuar hetim për abuzim me fondet publike dhe rrezikim të shëndetit publik./tvklan.al
