Një ngjarje e rëndë familjare ka ndodhur në Napoli, ku një 28-vjeçar dyshohet se ka vrarë me thikë motrën e tij 22-vjeçare, pas një debati të nisur për shkak të muzikës së lartë në banesë.
Sipas mediave italiane, viktima është identifikuar si Jleina Musella, ndërsa autori i dyshuar është vëllai i saj, Giuseppe Musella. Ngjarja ka ndodhur pasditen e djeshme në shtëpinë e tyre.
Nga hetimet paraprake, shkak i konfliktit ka qenë muzika që e reja po dëgjonte në banesë. I riu ka deklaruar se motra nuk e linte të flinte, çka ka sjellë një debat mes tyre. Pas përplasjes verbale, ai dyshohet se ka marrë një thikë nga kuzhina dhe e ka goditur motrën në shpinë.
Pas ngjarjes, 28-vjeçari e ka dërguar të motrën në spital dhe më pas është larguar nga vendi i ngjarjes. Fatkeqësisht, 22-vjeçarja nuk ka mundur t’u mbijetojë plagëve të marra dhe ka ndërruar jetë.
Disa orë më vonë, Giuseppe Musella është vetëdorëzuar në polici, ku ka pranuar autorësinë e ngjarjes.
“E vrava motrën time, nuk kisha ndërmend ta vrisja”, ka deklaruar ai para autoriteteve.
