Një plagosje me thikë raportohet të ketë ndodhur mbrëmjen e kaluar, në fshatin Ostren të Bulqizës.
58-vjeçar Bastri Nuredini, ka plagosur me thikë djalin e tij 29-vjeçar Kongres Nuredini, pas një konflikti të çastit.
Sipas Policisë, sherri ka nisur për motive të dobëta, ndërkohë 58-vjeçari është arrestuar, ndërsa i riu i plagosur ndodhet në spital, aktualisht jashtë rrezikut për jetën.
“Rreth orës 23:00, të datës 29 janar 2026, në fshatin Ostren, dyshohet se pas një konflikti të çastit, për motive të dobëta, shtetasi B.N., 58 vjeç, brenda banesës, ka plagosur me mjet prerës (thikë) djalin e tij, shtetasin K.N., 29 vjeç.
Menjëherë pas marrjes së njoftimit, shërbimet e Komisariatit të Policisë Bulqizë kanë shkuar në vendngjarje dhe kanë kapur dhe arrestuar autorin e dyshuar të ngjarjes, shtetasin B.N., 58 vjeç. Gjithashtu, është sekuestruar mjeti prerës (thikë) i përdorur nga autori”,- thuhet në njoftimin e Policisë.
Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
