Dy të rinj janë arrestuar nga Policia, pasi akuzohen se po transportonin klandestinë drejt vendeve të BE-së.
Në pranga janë vënë Arlen Coku, 38 vjeç, banues në Tiranë dhe Endrit Tota, 35 vjeç, banues në Kukës.
Sipas Policisë, në aksin rrugor Tiranë-Durrës, u ndalua automjeti me drejtues 38-vjeçarin Arlen Coku, dhe pasagjerë 4 emigrantë, të cilët po transportoheshin drejt Kukësit dhe më pas do të ndihmoheshin nga 35-vjeçari Endrit Tota, për të kaluar ilegalisht në shtetet e BE-së.
Dy të rinjtë janë shoqëruar për veprime të mëtejshme, ndërkohë u sekuestruan automjeti me të cilin transportoheshin emigrantët dhe 2 celularë.
Materialet procedurale iu referuan Prokurorisë së Tiranës, për veprime të mëtejshme.
