Deputeti i PD, Gazment Bardhi, ka ngritur shqetësimin për gjendjen e lirisë së shprehjes në Shqipëri, duke kërkuar depenalizimin e veprave penale të fyerjes dhe shpifjes, në përputhje me standardet europiane.
Në një reagim në rrjetet sociale, Bardhi theksoi se raportet e OSBE-ODIHR dhe praktikat e Bashkimit Evropian rekomandojnë që shpifja dhe fyerja të trajtohen si çështje civile dhe jo si vepra penale.
Sipas tij, dhjetëra gazetarë në vend po përballen me ndjekje penale nga politikanë dhe ish-zyrtarë të sistemit të drejtësisë, çka, sipas Bardhit, përbën rrezik për lirinë e medias dhe funksionimin e demokracisë.
Reagimi i plotë i Gazment Bardhi:
Standardet europiane për lirinë e shprehjes dhe raportet e OSBE-ODIHR kërkojnë që Shqipëria të depenalizojë veprat penale të fyerjes dhe shpifjes, duke i konsideruar vetëm shkelje civile. Kjo masë është e rëndësishme për garantimin e lirisë së shprehjes, veçanërisht për median dhe aktivistët e shoqërisë civile.
Sot janë plot 77 gazetarë në Shqipëri që po përballen me akuza për shpifje nga politikanë apo ish-prokurorë/gjyqtarë të shkarkuar nga vettingu. Ky përbën një rrezik real për lirinë e shprehjes dhe sigurinë e gazetarëve.
Për këtë arsye, opozita mbështet depenalizimin e plotë të veprave penale të shpifjeve/fyerjeve, si dhe mbështesim reformimin e rregullave civile për këtë shkelje sipas standardeve europiane.
