Policia italine ka arrestuar 17 persona të dyshuar për trafik dhe posedim të lëndëve narkotike, në rajonet e Lombardisë dhe Piemontes.
Operacioni u shtri në provincat e Bergamos, Breshias, Torinos dhe Verbanias dhe çoi në sekuestrimin e 7 kilogramëve hashash, 700 gramëve kokainë si dhe mbi 84 mijë eurove cash.
Sipas hetimeve, të arrestuarit janë dhjetë shtetas italianë, gjashtë marokenë dhe një shqiptar, të gjithë persona me precedentë penalë. Ata u identifikuan pas një hetimi që kishte nisur në prill të vitit 2024, lidhur me një rrjet të strukturuar të trafikut të kanabisit dhe kokainës, me një xhiro mujore rreth 400 mijë euro.
Autoritetet bëjnë me dije se qendra e aktivitetit kriminal ishte komuna Pian Camuno në provincën e Brescias, ku realizohej edhe pjesa më e madhe e shpërndarjes së drogës.
Metodat e shpërndarjes u dokumentuan përmes kamerave të fshehta të instaluara nga Karabinierët. Sipas pamjeve filmike, blerësit mbërrinin në këmbë ose me skuter në një rrugicë anësore, ndërsa trafikantët fshiheshin mes shkurreve.
