Gazeta prestigjioze gjermane Frankfurter Allgemeine Zeitung (FAZ), i ka kushtuar vëmendje të veçantë protestës së opozitës shqiptare në Tiranë, duke e pasqyruar atë si një zhvillim me rëndësi në skenën politike të vendit.
Sipas raportimit, mijëra qytetarë dhe mbështetës të opozitës, u mblodhën përpara godinës së qeverisë për të protestuar kundër kryeministrit Edi Rama. Protesta u shoqërua me përplasje mes demonstruesve dhe forcave të rendit, ku pati përdorim të koktejve Molotov nga protestuesit dhe gaz lotsjellës e topa uji nga policia.
Berisha u bëri thirrje qytetarëve “të bashkohen për të rrëzuar këtë qeveri” dhe kërkoi krijimin e një qeverie teknike që do të përgatisë zgjedhje të parakohshme, të lira dhe të ndershme. Ai e cilësoi situatën si “fazën e fundit para fundit të qeverisë së Edi Ramës” dhe premtoi vijimin e aksionit politik.
FAZ evidenton gjithashtu klimën e tensionuar politike në Shqipëri, ku opozita akuzon qeverinë për korrupsion dhe lidhje me krimin e organizuar.
Në raport përmenden hetimet dhe akuzat ndaj disa zyrtarëve të lartë, përfshirë ish-ministra dhe figura të tjera politike, duke theksuar se korrupsioni mbetet një nga sfidat kryesore në rrugën e Shqipërisë drejt integrimit në Bashkimin Evropian.
Frankfurter Allgemeine Zeitung (FAZ):
Në kryeqytetin shqiptar, Tiranë, mijëra njerëz kanë protestuar kundër qeverisë së kryeministrit Edi Rama. Protestat janë shoqëruar me përplasje të dhunshme.
Në Shqipëri, gjatë protestave kundër politikave të kryeministrit socialist Edi Rama, kanë ndodhur përleshje mes demonstruesve dhe forcave të sigurisë. Disa mijëra mbështetës të liderit të opozitës, Sali Berisha, u mblodhën të shtunën përpara godinës së qeverisë në qendër të Tiranës, sipas një reporteri të agjencisë së lajmeve AFP.
Gjykata Kushtetuese, e thirrur nga qeveria, e riktheu përkohësisht në detyrë Ballukun në muajin dhjetor. Të mërkurën, një komision parlamentar pritet të shqyrtojë kërkesën e Prokurorisë për heqjen e imunitetit të Ballukut, me qëllim që të bëhet e mundur arrestimi i saj.
Korrupsioni dhe krimi i organizuar janë pengesa kryesore për synimin e Shqipërisë për t’u anëtarësuar në Bashkimin Evropian. Kryetari i Bashkisë së Tiranës, Erion Veliaj, ishte arrestuar në shkurt të vitit të kaluar nën dyshimet për korrupsion dhe pastrim parash.
Dy ish-ministra të Ramës akuzohen për përvetësim dhe shpërdorim detyre. Ish-presidenti Ilir Meta u arrestua në tetor 2024, gjithashtu nën akuzat për korrupsion dhe pastrim parash.
Kreu i Partisë Demokratike të djathtë, Berisha, i bëri thirrje turmës që “të bashkohet për të rrëzuar këtë qeveri” dhe për të vendosur një qeveri teknike që do të “përgatisë zgjedhje të parakohshme, të lira dhe të ndershme”.
Kokteje Molotov, gaz lotsjellës dhe topa uji
Pas fjalimit të politikanit të opozitës, protestuesit hodhën kokteje Molotov drejt policisë, e cila u përgjigj me gaz lotsjellës dhe topa uji për të shpërndarë turmën. Përplasje të tjera ndodhën kur protestuesit marshuan drejt Parlamentit, ku u përpoqën të thyenin kordonët e policisë me gurë dhe kokteje Molotov. Forcat e sigurisë përdorën sërish gaz lotsjellës dhe topa uji.
Sipas policisë, të paktën dhjetë policë u plagosën lehtë. Berisha deklaroi se 25 protestues ishin arrestuar. Ai e cilësoi këtë si “fazën e fundit para fundit të qeverisë së Edi Ramës” dhe premtoi se do ta vazhdojë luftën politike.
Palët politike akuzojnë njëra-tjetrën për korrupsion
Politika në Shqipëri karakterizohet nga sulme të ashpra verbale mes kampeve të djathta dhe të majta. Partitë fyejnë rregullisht njëra-tjetrën dhe akuzojnë palën kundërshtare për korrupsion dhe lidhje me krimin e organizuar. Vetë Berisha akuzohet se ka dhënë kontrata publike për bashkëpunëtorët e tij, akuza që ai i mohon kategorikisht.
Në nëntor, zëvendëskryeministrja Belinda Balluku, një bashkëpunëtore e ngushtë e Ramës, u pezullua nga një gjykatë antikorrupsion për shkak të dyshimeve për përfshirje në një skandal korrupsioni lidhur me kontrata publike. Rama e cilësoi pezullimin e saj si “një ndërhyrje brutale në pavarësinë e ekzekutivit”.
