Një stuhi e fuqishme dimërore ka përfshirë një pjesë të madhe të Shteteve të Bashkuara, duke shkaktuar ndërprerje masive të energjisë elektrike dhe kaos në transportin ajror.
Sipas të dhënave të publikuara nga faqja poweroutage.us, më shumë se 618 mijë familje në të gjithë vendin kanë mbetur pa energji elektrike. Shtetet më të prekura janë Misisipi, Luiziana dhe Teksasi.
Autoritetet meteorologjike bëjnë me dije se mbi gjysma e popullsisë amerikane po përballet me pasoja nga një prej stuhive më të forta dimërore të viteve të fundit. Sistemi i motit pritet të shtrihet në një distancë prej rreth 3 mijë kilometrash, nga New Mexico në jugperëndim deri në Maine në verilindje.
Ndërkohë, sektori i aviacionit është goditur rëndë nga kushtet e motit. Deri më tani janë anuluar të paktën 14,800 fluturime, ndërsa mijëra të tjera janë vonuar për shkak të borës, akullit dhe erërave të forta.
Në qytete të mëdha si Nju Jorku dhe Atlanta, autoritetet kanë shpallur gjendje gatishmërie për shkak të reshjeve të dendura të borës dhe shiut të ngrirë, që kanë krijuar kushte të rrezikshme në rrugë dhe aeroporte.
Në shumë zona urbane, qytetarët janë dyndur në supermarkete për të siguruar ushqime, ujë dhe produkte bazë, ndërsa raftet janë zbrazur brenda pak orësh. Qarkullimi rrugor është vështirësuar ndjeshëm dhe autoritetet u kanë bërë thirrje banorëve të shmangin udhëtimet e panevojshme.
