Kryenegociatori i presidentit amerikan Donald Trump, Steve Witkoff, është shprehur optimist për përparimin e bisedimeve mes Rusisë, Ukrainës dhe Shteteve të Bashkuara, pas takimit të zhvilluar në Abu Dhabi.
Në një reagim në rrjetin social X, Witkoff deklaroi se bisedimet dyditore ishin “shumë konstruktive” dhe se palët kanë rënë dakord të rifillojnë negociatat javën e ardhshme në të njëjtin vend.
Ai shtoi se presidenti Trump është i përkushtuar për arritjen e një marrëveshjeje paqeje mes Moskës dhe Kievit.
Takimi në Abu Dhabi shënon herën e parë që përfaqësues të Rusisë, Ukrainës dhe SHBA-së ulen së bashku në tryezë që prej nisjes së luftës në shkurt të vitit 2022. Megjithatë, detajet konkrete të diskutimeve nuk janë bërë publike, pasi palët kanë mbajtur qëndrim të rezervuar mbi rezultatet.
Bisedimet u zhvilluan pak ditë pasi Witkoff dhe Jared Kushner, dhëndri i Trump, u takuan me presidentin rus Vladimir Putin në Moskë. Ndërkohë, Trump zhvilloi një bisedë me presidentin ukrainas Volodymyr Zelensky gjatë Forumit Ekonomik Botëror në Davos.
