Deputetja e Partia Demokratike, Jorida Tabaku, gjatë një takimi me anëtarë dhe simpatizantë të degës nr. 2 në Tiranë, deklaroi se Partia Demokratike mbetet alternativa më e mirë për Shqipërinë dhe shqiptarët.
Në fjalën e saj, Tabaku theksoi se vendi po kalon një periudhë të vështirë ekonomike dhe sociale, duke nënvizuar rritjen e çmimeve, përkeqësimin e arsimit dhe largimin e profesionistëve nga vendi.
Sipas saj, këto probleme kërkojnë një opozitë të fortë dhe të bashkuar, të përqendruar te nevojat reale të qytetarëve.
Tabaku: Por sigurisht, për ato që duan ta ndryshojnë këtë vend dhe objektivi jonë është pikërisht për të ndryshuar këtë vend, kjo është mëse e arritshme. Rruga e drejt ringritjes së Partisë Demokratike kërkon guxim. Kërkon edhe guximin për të ndryshuar veten, por nga ana tjetër kërkon dhe vendosmëri. Për të ndryshuar mënyrën se si bëjmë politikë, se si hapemi, se si e bëjmë Partinë Demokratike shtëpinë e gjithë shqiptarëve, si dëgjojmë e si i përgjigjemi realitetit të sotëm.
Kjo nuk bëhet thjesht sepse ka ardhur koha për të ndryshuar. Por bëhet për të respektuar të gjithë demokratët e thjeshtë, për t’ju respektuar juve. Për të respektuar ata që kanë punuar me mish e me shpirt. Për të respektuar ata që janë themeli jonë e që do të vazhdojnë të jenë themeli jonë, anëtarët e Partisë Demokratike. Në këto 12 vjet vite opozitë ne kemi parë e kemi dëgjuar shumë. Kemi qenë të goditur edhe nga një sistem i kapur. Ndonjëherë edhe jemi lodhur nga beteja. Me pak mençuri mund t’i kishim evituar shumë nga ato që kemi kaluar veçanërisht në katër vitet e fundit. Por një gjë e kemi mësuar: Që Partia Demokratike është rezistente. Partia Demokratike është këtu, është në këmbë.
