Kryedemokati Sali Berisha zhvillon sot një takim me simpatizantë dhe mbështetës të PD-së në Degën 2 në Tiranë.
Në fjalën e tij, Berisha u shpreh se shqiptarët po qeverisën nga partia e krimit, teksa akuzoi Partinë Socialiste se po shkatërron kombin.
“Takohem me ju me shpresë dhe besim të plotë sepse në 35 vite kur ndalemi dhe vështrojmë pas, ne vijmë këtu si njerëz të idealeve, që sakrifikuam për idealet më të larta, votën e lirë, atdhedashurinë, familjen dhe Shqipërinë.
Ne ia dolëm në një kohë kur nuk dinim asgjë, por mësuam të vendosur dhe në katër vite ndodhi një ndryshim epokal i Shqipërisë.
Kemi një problem serioz. Korrupsionin nuk kemi arritur që të krijojë zemërimin e madh të qytetarit. Nuk është ai reagim që duhet të jetë. Është defekti ynë dhe duhet ta pranojmë.
Në pushtet erdhi partia e krimit. Nuk mund të ketë emër tjetër. Në fakt, ajo ka lindur në krim dhe ka mbijetuar në shtypjen më të egër të shqiptarëve. Sot, më shumë se kurrë, po vjedh shqiptarët dhe po shkatërron kombin”,-tha Berisha.
