Një shtetas shqiptar, 43 vjeç, është arrestuar nga karabinierët italianë, pasi dyshohet si pjesë e një rrjeti shpërndarjeje të lëndëve narkotike.
Operacioni u zhvillua nga efektivët e Carabinieri në zonën e Cessalto, në bashkëpunim me Njësinë e Qenve Antidrogë të Torreglia, pas një hetimi për trafik droge.
Gjatë kontrollit personal dhe të automjetit, falë reagimit të qenve antidrogë, u gjetën 7 gramë kokainë, të ndara në shtatë doza gati për shitje. Po ashtu, policia sekuestroi materiale paketimi dhe një peshore precize.
Lënda narkotike dhe sendet e tjera u sekuestruan, ndërsa 43-vjeçari u vu në arrest shtëpiak, në pritje të vendimeve të autoriteteve gjyqësore.
Autoritetet po hetojnë për të zbardhur rolin e tij të plotë dhe lidhjet e mundshme me persona të tjerë të përfshirë në aktivitetin e paligjshëm.
