Përdorimi i dënimit me vdekje në nivel global po rritet me një ritëm alarmant, ka paralajmëruar OKB përmes Komisionerit të Lartë për të Drejtat e Njeriut, Volker Türk.
Në një deklaratë të publikuar nga Gjenevë, Türk shprehu shqetësim të veçantë për situatën në Iran, Arabia Saudite dhe Shtetet e Bashkuara, mes vendeve të tjera ku ky dënim po zbatohet në rritje.
Sipas të dhënave të përmendura në deklaratë, vetëm në Iran janë ekzekutuar të paktën 1.500 persona gjatë vitit 2025. Komisioneri i Lartë theksoi se “shkalla dhe ritmi i ekzekutimeve sugjerojnë një përdorim sistematik të dënimit me vdekje si mjet frikësimi shtetëror”.
OKB ka bërë thirrje të vazhdueshme për heqjen e dënimit me vdekje, duke e konsideruar atë shkelje të rëndë të të drejtave të njeriut dhe një praktikë që nuk kontribuon në uljen e krimit.
Sipas organizatës, rritja e ekzekutimeve përbën një hap prapa në përpjekjet globale për mbrojtjen e jetës dhe dinjitetit njerëzor.
