Shtyhet seanca në Themel për kreun e Partisë së Lirisë Ilir Meta dhe ish-deputeten Monika Kryemadhi.
Ndërkohë mësohet se e radhës do të mbahet më 9 korrik, ora 10:00.
Seanca e sotme u zhvillua me debate të ashpra mes dy ish-bashkëshortëve të cilët shkëmbyen akuza të ndërsjella mes tyre.
Meta tha se nuk ka dijeni për veprimet e Kryemadhit, duke shtuar se ajo e di vetë historinë e mesazheve të dorëzuara si prova nga prokuroria.
Kryemadhi është kundërpërgjigjur duke i thënë se nuk duhet të flasë bazë thashethemesh e llafesh grash, apo fjalët që i sjell, sipas saj Altin Dumani.
Gjithashtu në seancën e sotme, avokati i Ilir Metës, Kujtim Cakrani kërkoi që të thirren si dëshmitarë kryeministri Edi Rama, Gramoz Ruçi dhe Taulant Balla, duke argumentuar se SPAK nuk i ka pyetur ata për rolin e mundshëm të Metës në lidhje me ligjin e minierave.
Akuzat
Ilir Meta dhe Monika Kryemadhi janë nën hetim nga SPAK dhe po përballen me akuza të lidhura me korrupsionin dhe pastrimin e parave.
Procesi gjyqësor ka të bëjë kryesisht me çështjen e njohur si CEZ-DIA, një marrëveshje e diskutueshme mes kompanisë çeke CEZ dhe kompanisë DIA për mbledhjen e borxheve të energjisë elektrike.
Sipas dosjes së SPAK, Ilir Meta dyshohet se ka pasur rol në favorizimin e marrëveshjes CEZ-DIA, duke përfituar në mënyrë të paligjshme.
Prokuroria pretendon se ka prova që e lidhin atë me korrupsionin, përfshirë komunikime dhe dokumente të siguruara gjatë hetimit.
Meta i ka cilësuar këto akuza si të motivuara politikisht dhe ka deklaruar se procesi është i montuar për ta dëmtuar politikisht.
Monika Kryemadhi akuzohet për pastrim parash, duke përdorur transaksione financiare të dyshimta për të fshehur origjinën e fondeve të paligjshme.
SPAK ka hetuar llogaritë bankare dhe pasuritë e saj, duke ngritur dyshime për përfitime të pashpjeguara. Kryemadhi ka mohuar çdo akuzë, duke thënë se bëhet fjalë për një sulm politik ndaj saj dhe familjes.
