Autoritetet italiane kanë arrestuar një shqiptar 26-vjeçar i cili kishte kthyer dhomën e hotelit në një laborator droge. Operacioni është kryer në rajonin e Parmës, ndërsa u sekuestruan 4 kilogramë kokainë dhe hashash.
Nga hetimet rezulton se shqiptari kishte rezervuar një dhomë në një hotel në Parma. Por udhëtimi i tij nuk ishte turistik. Brenda dhomës, ai fshihte gati katër kilogramë hashash dhe kokainë.
Policia, pas një informacioni nga sistemi kompjuterik Alloggiati Web, kreu një inspektim dhe arrestoi në flagrancë 26-vjeçarin shqiptar.
Përveç 3.9 kilogramëve kanabis, oficerët e Policisë së Parmës gjetën edhe 110 gramë kokainë. I huaji, i cili qëndron ilegalisht në Itali, u akuzua gjithashtu për shkelje të ligjeve të imigracionit.
Rreth 4,000 doza hashashi u hoqën nga tregu i trafikut të drogës.
