SPAK ka zbardhur skemën e grupit të strukturuar kriminal i cili trafikonte kokainë nga vendet e Amerikës Latine drejt Shqipërisë, për ta përpunuar dhe më pas shpërndarë në tregun evropian.
Hetimi ka çuar deri tani në arrestimin e dhjetë personave, shtatë shtetas shqiptarë dhe tre shtetas nga Amerika Latine,
Hetimi çoi në zbulimin e një laboratori të sofistikuar për përpunimin e kokainës në fshatin Qerekë të Fushë Krujës, si dhe dy ambiente mbështetëse në Tiranë dhe Durrës.
Grupi kriminal përdorte kompaninë “Alb Lëkurë”, të regjistruar në tetor 2020, për të kamufluar aktivitetin e paligjshëm. Në maj 2024, kompania kreu një pagesë prej 23 mijë dollarësh tek një firmë në Republikën Domenikane për importimin e 24 ton lëkurë gjedhësh me kripë. Ngarkesa mbërriti në Portin e Durrësit në korrik dhe u transportua në një magazinë në Mullet.
Një tjetër ngarkesë prej 24 tonësh mbërriti në nëntor 2024, për të cilën u paguan rreth 20 mijë dollarë. SPAK dyshon se grupi nxirrte kokainë nga laboratori edhe për llogari të grupeve të tjera kriminale.
Në vendimin e Gjykatës bie në sy roli i kolumbianit Hiwlen Ledezma Narvaez, i njohur me pseudonimin “Gafas”. Ai ishte marrë nga grupi si ekspert për ndarjen e kokainës nga lëkura dhe rezulton i kërkuar në Kolumbi si lider i një grupi kriminal.
Narvaez ndodhej prej një viti në Shqipëri dhe emri i tij lidhet me operacionin policor “Pacifico” të zhvilluar në nëntor 2023, ku u arrestua edhe shtetasi shqiptar Klodian Zaimi, i afërm i Artjon Çaushllarit – një nga financuesit e trafikut.
SPAK bëri të ditur se në maj 2024, “Gafas” ka qëndruar për disa orë në një vilë në Pogradec, i shoqëruar nga Çaushllari dhe Klajdi Birçe, ku dyshohet se është nxjerrë një sasi kokaine. Agjentët nuk ndërhynë për të mos dekonspiruar operacionin.
Personat e arrestuar
Shtetas shqiptar:
1- Geis Fejsullai 42 vjeç, banues në Tiranë
2- Klajd Birçe 40 vjeç, banues në Tiranë
3- Aldi Zonja 37 vjeç, banues në Tiranë
4- Artion Çaushllari, 37 vjeç, banues në Tiranë
5- Endi Sejdini, 25 vjeç, banues në Krujë
6- Ismail Abdurrahmani, 51 vjeç, banues në Shkodër
7 – Baki Huqi, 57 vjeç, banues në Durrës
Shtetas të huaj:
8-Hiwlen Ledezma Narvaez, 41 vjeç, shtetas kolumbian
9-Joze Ramon Zacarias Vasquez, 35 vjeç, shtetas venezuelian
10-Samuel Alfonso Moreno Serrano, 42 vjeç, shtetas venezuelian
