Policia e Durrësit ka konfirmuar arrestimin e ish-drejtorit të Institucionit të Ekzekutimit të Vendimeve Penale (IEVP) të Durrësit, Indrit Cërrloj, një ditë pasi u pezullua nga posti pas arratisjes së të dënuarit me rrezikshmëri të lartë, Altin Ndoci.
Sipas policisë, arrestimi u bë pasi gjykata caktoi masën “arrest në burg” për Cërrlojn, i cili dyshohet për shpërdorim detyre lidhur me këtë rast.
Ndërkohë, për doktoreshën e burgut të Durrësit, Ylvete Sema, gjykata ka vendosur masën “arrest në shtëpi”. Ajo dyshohet se ka pasur rol në ngjarje dhe akuzohet për të njëjtën vepër penale.
Si ndodhi arratisja
Altin Ndoci ishte shoqëruar nga paraburgimi i Durrësit për në spitalin Rajonal të qytetit, për të kryer një vizitë mjekësore te infektivi, në katin e tretë të spitalit, i cili ka edhe repartin e posaçëm të sigurisë për të dënuarit.
Nga burgu drejt spitalit, Ndocin e kanë shoqëruar 5 policë, shoferi dhe 4 efektivë, por 2 prej efektivëve kanë qëndruar në makinë bashkë me drejtuesin dhe 2 policë të tjerë e kanë shoqëruar brenda spitalit.
Gjatë vizitës, Ndoci ka kërkuar të shkojë në tualet dhe njeri prej policëve të burgjeve e ka shoqëruar. Në këtë moment, kur sapo ka dalë nga tualeti, Ndoci ka goditur dy efektivët në pjesën e barkut dhe i ka shtyrë duke i larguar me shpejtësi nga kati i tretë i spitalit.
