Nga Boldnews.al
Për kryeministrin Edi Rama, Reforma në Drejtësi në Shqipëri, guri i kurorës së lidershipit të Partisë Socialiste, “krijoi një sistem gjyqësor të pavarur, por jo të paanshëm dhe cilësor”.
Prej vitit 2015, Rama dhe pasuesit e tij i kanë mëshuar fort idesë se Reforma në Drejtësi në Shqipëri është ndërtuar vetëm nga Partia Socialiste.
Disa muaj më parë, ai, madje, mohoi edhe kontributin e partnerëve ndërkombëtarë, Shteteve të Bashkuara dhe Bashkimit Europian, të cilët më herët i ka quajtur si “bashkëautorë”, të cilët i vendoste përballë kujtdo që kishte guximin të kritikonte arkitekturën e re, të rrëmujshme të drejtësisë së re, një korpus kushtetues e ligjor që i siguroi jetëgjatësi në pushtet.
Por, fjalori i Ramës për “Drejtësinë e Re” ndryshoi sapo prangat iu afruan zyrës ngjitur në kryeministri, tek zëvendësja e tij, Belinda Balluku.
Rama është shquar se, për llogari të pushtetit të tij, “shet” të gjithë ata që ka pranë. Këtë e kanë provuar në kohë, Saimir Tahiri, Arben Ahmetaj, Vangjush Dako, Erion Veliaj dhe, nuk ka asnjë arsye të besohet se ai po shqetësohet për fatin e Belës së tij.
Halli më i madh i kreut të qeverisë është se orteku i “drejtësisë së pavarur” mund të marrë edhe atë me vete, jo më shumë për vullnetin e prokurorëve, sesa për ndonjë “urdhëresë” që, ndoshta, mbërrin prej përtej Oqeanit.
Frika e prangave e nxit Ramën që të lëshojë thagma, si kjo e fundit, kur, në vlerësimin e tij, drejtësia nuk është e paanshme.
Nëse merret e mirëqenë ky variant, natyrshëm lind pyetja; në cilën anë është “Drejtësia e Re”?
Rama lë të kuptohet se, përsa kohë drejtësia “e anshme” po godet në oborrin e tij, rrjedhimisht ajo është me opozitën. Por, me kë opozitë? Drejtuesit e dy partive kryesore opozitare, Sali Berisha dhe Ilir Meta, janë marrë të pandehur nga “drejtësia e re”, pas ultimatumeve që ka lëshuara Rama në forumet e Partisë Socialiste. Madje, Meta u tërhoq zvarrë në rrugë, vetëm e vetëm për të treguar se “drejtësia e re” është e rreptë.
Nëse drejtësia nuk anon nga Berisha e Meta, atëherë, sipas versionit të Ramës, duhet të anojë nga të tjerë opozitarë, Agron Shehaj, Adriatik Lapaj apo edhe Arlind Qorri. Kjo treshe politikanësh kanë treguar mbështetje për “Drejtësinë e Re”, më saktë për Prokurorinë e Posaçme SPAK. Por, ata, si veç e veç, si të tre bashkë, janë shumë larg forcës politike për të diktuar gjyqësorin.
Ka edhe një “aktor” tjetër të rëndësishëm, e cila mund të tërheqë me forcë magnetike “Drejtësinë e Re”. Ata, natyrisht janë partnerët ndërkombëtarë, më troç Shtetet e Bashkuara të Amerikës.
Nëse Rama aludon se “anësia” e Prokurorisë dhe Gjykatës së Posaçme shkon drejt “sherifëve” përtej Atlantikut, atëherë ai e ka të qartë ose, mund ta mësojë shumë shpejt, se nuk do t’i bëjnë aspak “fajde” postimet në rrjetet sociale mbi bashkëpunimin me Presidentin Francez, Makron, për konsolidimin e Kodit Penal të Shqipërisë.
Deri më tani, “Drejtësia e Re” ka treguar se jo vetëm ka anuar nga Rama, por është treguar si një gjilpërë me kokë e bindur drejt polit magnetik të Ramës. Dhe, po, Ai ka shumë të drejtë; drejtësia e re (penale) është e anshme-në anën e tij, siç ka qenë që në kohën e ngjizjes së saj, një dekadë më parë.
