Reshjet me intensitet të lartë të dëborës kanë shkaktuar bllokimin e aksit rrugor Librazhd–Peshkopi, duke krijuar vështirësi serioze për qarkullimin. Dhjetëra qytetarë kanë mbetur të bllokuar me mjetet e tyre në zonën e njohur si “Shkalla e Lunikut”.
Kjo zonë, e frekuentuar gjerësisht nga turistët, vijon të përballet me probleme të mëdha, ndërsa raportohet se prej disa ditësh nuk është kryer asnjë ndërhyrje për kriposje apo hedhje skorjeje, pavarësisht pranisë së vazhdueshme të dëborës dhe temperaturave të ulëta që kanë sjellë ngrica të rrezikshme.
Sipas informacioneve nga terreni, firma kontraktore përgjegjëse për mirëmbajtjen e këtij aksi nuk ka ndërhyrë, duke bërë që situata të përkeqësohet. Si pasojë, dhjetëra automjete dhe qindra turistë, të nisur drejt turizmit malor në Parkun Kombëtar të Shebenikut, kanë mbetur të bllokuar për orë të tëra.
Ndërkohë, raportohet se të izoluara kanë mbetur edhe disa fshatra të zonës, ndërsa banorët kërkojnë ndërhyrje urgjente për hapjen e rrugës dhe normalizimin e situatës.
