Nga Boldnews.al
Kryeministri Edi Rama, strukturën më të rëndësishme të drejtësisë së re, Prokurorinë Speciale, SPAK, për pesë vite e trajtoi në mënyrë tallëse dhe shërbyese, ngjashëm me cubin e lagjes që dërgon për të marrë paketa cigaresh ndonjë fëmijë që sheh më afër. E denigroi SPAK-un deri në pikën ku i orientoi se ku do të hetonin, e kë do të shihte në burg, duke mos përdorur aspak kanalet e errëta si porosi nga shefi, por haptas, publike dhe sfiduese.
“Sado të mundohemi ne dhe sado hetime e dënime të jepen në këtë vend, nëse non grata e madhe dhe ai i dyti atje, (shënim: Berisha dhe Meta), që SPAK-u funksionin si sahat, prokurorët dhe gjykatës që e bënë gjak sistemin e drejtësisë, nuk shkojnë para drejtësisë, është problem i madh i Shqipërisë të nesërmes. Kjo do të jetë kënga e re që do të fillojë në tryezën e negociatave. Ia përsëris SPAK-ut. Keni për të hetuar këdo qoftë që i përket kësaj partie, edhe nivelet më të larta, por po hyni në kohën shtesë me të keqen në këtë vend dhe ajo po kualifikohet, ndërsa ju jo”, tha qartësisht Rama në maj të vitit 2022, një vit pasi kishte marrë mandatin e tretë dhe po shtrinte rrugën për të katërtin, pestin e sa donte vete, duke përdorur “çunin e lagjes”.
SPAK-u jo vetëm dëgjoi si në faj, por veproi shpejt. Berisha përfundoi i izoluar në arrest shtëpie, ndërsa Meta u zvarrit nga policia e dhunshme tek Kthesa e Kamzës për tu plasur në qeli. Fitore në tavolinë të çdo palë zgjedhjesh për Ramën, duke trajtuar drejtësinë e re seriozisht si një “foshnje në rritje”, sikurse e ka cilësuar vetë, por një fëmijë të rritur keq dhe përdorur nga cubi lagjes që dehet jo nga rakia e përzier, por vera 33 mijë euro….!
Kohët kanë ndryshuar. Jo se të rrahurit që “këlyshë” janë janë bërë “zagarë gjuetie” të mirë, por do vinte çasti që cubi i lagjes më të përhumbur nuk mund të sillej si trazovaç që nën haluçinacione mendon se bota vërtitet rreth tij.
Kryeministri Rama po mendon se çfarë deklarate do të japë, para dhe pas thirrjes në SPAK. A do i quajë “kolegë” pjestarët e SPAK? Këtë e bëri Veliaj dhe nuk mund të përsërisë sjelljen e ish-kanakarit të tij që nga çirak tentoi të bëhej usta, kur vetë “ustai” nuk kishte në mendje të linte çelësat e dyqanit Shqipëri.
Po nëse do e quajë sulm politik të inskenuar nga poshtë, lart dhe larg, por jo aq larg sa përtej Atlantikut….!? As këtë nuk mund ta thotë, pasi së pari del i pabesueshëm dhe mbi të gjitha qesharak dhe i nënshtruar. Rama ka vetëm një rrugë: të përballet dhe të tentojë të trimërohet fort edhe një herë, duke i kërkuar sërish “cunit të vogël” të lagjes t’i bindet atij. Tashmë çështja është se “fëmija i parritur” ka nisur të kuptojë por edhe “gjejë prehje” tek më të drejtët, pse jo edhe shumë më të fortët.
SPAK nuk mund të rrihet vazhdimisht nga “babai i dehur politik” që ka përdorur edhe rripin e pantallonave për t’i lënë kësaj foshnje shenja për jo pak, por pesë vite. Hoqi rripin për ta rrahur dhe përdorur gjatë, shumë gjatë, dhunshëm e kërcënueshëm, por nuk kuptoi se rripi i hequr spo ia mban më pantallonat, duke mbetur si mbret çullak.
Fatkeqësisht, të rrahurit janë ende të trembur, kjo edhe sepse “lagjja” nuk po ngrihet kundër cubit dhunues dhe pijenec që ka shkatërruar dhe grabitur gjithçka, bashkë me lacat e tjerë të vegjël që përdorën drejtësinë e re për të pushtetuar gjatë. Fakt është që pa rrip e pantallona të rënë asgjë nuk kalon me mbluesit zyrtarucë brukselianë. Një tjetër fuqi po e sheh çullak “mbretin” e vetëshpallur.
