Banorët e fshatit Çiflik, në bashkinë Berat, kanë dalë sot në protestë duke akuzuar bashkinë për mbylljen e kanaleve të ujërave, situatë që sipas tyre po u rrezikon drejtpërdrejt banesat.
Sipas protestuesve, mbyllja e kanaleve kulluese ka bërë që uji të përfundojë brenda shtëpive, duke shkaktuar përmbytje të përsëritura. Ata deklarojnë se vetëm gjatë këtij muaji janë përmbytur tre herë dhe se gjendja po bëhet e padurueshme.
“Bashkia po na mbyt. Kanë mbyllur kanalet dhe uji po na futet nëpër banesa. Kemi kërkuar ndihmë, por askush nuk ka reaguar”– shprehen banorët.
Banorët i bëjnë thirrje institucioneve përgjegjëse që të ndërhyjnë urgjentisht, duke theksuar se situata përbën rrezik serioz për jetën dhe pronën e tyre.
