Gazetari Marsel Rupi ironizoi gjatë protestës së qytetarëve para Kryeministrisë pas publikimit të letrës së arkitektit holandez Reinier de Graaf, drejtuar kryeministrit Edi Rama, ku ai shkruan me tone satirike se për arkitektët do të ishte më mirë nëse Shqipëria nuk do të zhvillonte më zgjedhje dhe Rama do të mbetej “president i përjetshëm, ndoshta edhe mbret”.
Duke lexuar pjesë nga letra, Rupi citoi pasazhin ku de Graaf shprehet se profesioni i arkitektit varet nga patronazhi politik dhe se, nëse socialistët humbasin zgjedhjet, Shqipëria mund të mos mbetet më “meka e arkitekturës bashkëkohore”.
“Nuk e them këtë lehtë, por për ne arkitektët do të ishte më mirë nëse zgjedhjet e ardhshme thjesht do të anuloheshin. Madje do të shkoja një hap më tej. Duke pasur parasysh statusin e Shqipërisë si mbështetëse e arkitekturës, profesioni ynë do të përfitonte shumë nëse vendi nuk do të kishte më kurrë zgjedhje dhe ju, pas mandatit të pestë si kryeministër, do të vazhdonit si president përjetë, ndoshta edhe mbret”, thuhet në letrën e de Graaf.
Pas leximit të saj, gazetari e interpretoi mesazhin si një ironi ndaj qeverisjes dhe iu drejtua kryeministrit me tone sfiduese.
“Që të bëhesh mbret, në radhë të parë duhet të japësh dorëheqjen si kryeministër. Prandaj këtë duam edhe ne. Jep dorëheqjen, shko në zgjedhje të parakohshme me një qeveri teknike dhe ta shohim sa ‘mbret’ do të të bëjnë shqiptarët. Do ta shohë edhe Europa nëse shqiptarët i pranojnë autokratët apo i përzënë”, deklaroi ai.
Më tej, Rupi akuzoi qeverinë se po cenon demokracinë dhe tha se protestuesit kishin shtruar simbolikisht një “tapet të florinjtë” në shkallët e Kryeministrisë.
“Meqë keni vendosur të zhdukni demokracinë dhe të vendosni autokraci, e të bëheni edhe mbret, ne kemi shtruar një tapet të florinjtë para Kryeministrisë, siç e meritojnë mbretërit. Ne po kthehemi në skllevër, ti vazhdo mbretëro. Por, para se të bëhesh mbret, jep dorëheqjen, krijo një qeveri tranzitore, zhvillo zgjedhje të ndershme dhe ndrysho Kodin Zgjedhor. Pastaj ta shohim se sa mbret do të të bëjnë shqiptarët dhe diaspora”, u shpreh ai.
