Përmbytjet në Tiranë po marrin përmasa edhe më shqetësuese.
Në zonën e njohur si ‘Vilat Gjermane’, përgjatë Rrugës së Elbasanit, ditën e sotme kanë shpërthyer tubacionet e ujërave të zeza, duke hyrë në banesat dhe oborret e banorëve.
Pamjet e publikuara nga Syri.net tregojnë situatën e rëndë në terren, ku rrugët janë kthyer në kanale dhe njerëzit po përpiqen të shpëtojnë gjithçka munden në kushtet e një ndotjeje masive.
Uji i ndotur ka hyrë në katet e para të shtëpive, ndërsa banorët ankohen se përveç baltës dhe ujit të rrëmbyeshëm, po përballen tani edhe me rrezik shëndetësor nga kanalizimet e hapura.
Një pjesë e madhe e vendit është nën pushtetin e reshjeve, që prej 48 orësh kanë shkaktuar:
përmbytje masive në Durrës dhe evakuime banorësh
rrëshqitje dherash në Dibër dhe Gjirokastër
toka bujqësore nën ujë nga Vlora në Lezhë e Kurbin
banesa të përmbytura në Elbasan dhe fshatra përreth
rrugë të bllokuara dhe ndërprerje energjie në Kukës dhe Korçë
