Gazetari Andi Tela ka kritikuar ashpër qasjen e kryeministrit Edi Rama ndaj përmbytjeve, duke theksuar se ato nuk janë pasojë e një fatkeqësie natyrore të jashtëzakonshme, por rezultat i keqmenaxhimit dhe korrupsionit.
Sipas Telës, pamjet nga Durrësi japin përshtypjen e një katastrofe të madhe, ndonëse ka rënë vetëm shi i zakonshëm.
Ai akuzoi strukturat përgjegjëse për dështim në mirëmbajtjen e kanalizimeve dhe hidrovoreve, ndërsa qytetarët paguajnë taksa të larta që shpërdorohen, duke i detyruar të paguajnë dy herë: për parandalimin që nuk realizohet dhe për kompensimin e dëmeve.
Tela theksoi se fenomeni përsëritet në Durrës, Gjirokastër dhe Kurbin, ndërsa në qytete si Berati nuk ka përmbytje falë menaxhimit më të mirë. Ai ironizoi deklaratat e Ramës, duke kujtuar batutën e tij se “shiu ka punën e tij, ne kemi punën tonë”, të cilën e cilësoi si propagandë.
“Tani kur, kur dëgjova, kur dëgjova këtë, këtë mesazh të zotit Rama mu kujtua prapë ironia që i bënte me SPAK-un dhe me organet e tjera, duke përdorur atë batutën e famshme të ‘Loro Boriçit’ që shiu ka punën e tij, ne kemi punën tonë. Dhe ne kemi punën tonë në kuptimin e propagandës.
Por ka rënë shi. Vetëm shi ka rënë dhe ti sheh këto pamje. Dhe e kupton fare mirë që nuk është më faji i natyrës. Është faji i menaxhimit, i menaxhimit të strukturave që paguhen për të mos u krijuar këto imazhe.
Qytetarët e Durrësit, të asaj zone atje, paguajnë taksa që të rregullohen kanalizimet, që të rregullohet hidrovori. Këto taksa vidhen. Dhe pasi vidhen këto taksa, tashti kërkohen të merren taksa të tjera, ndoshta të neve që jetojmë këtu në Tiranë, për të kompensuar dëmin e këtyre banorëve. Pra paguajnë dy herë taksat. Edhe në Tiranë, por edhe në Durrës, paguhen taksa të larta infrastrukture për ndërtimet e reja. – tha ai.
