14-vjeçari Mariglen Dauti, i cili u shpall në kërkim nga Policia në Has, është lokalizuar në zonën e Mitrovicës.
I mituri ishte larguar një ditë më parë nga banesa, me makinën e të atit të cilën e kishte marrë pa leje dhe ishte larguar në drejtim të paditur, ndërkohë burime për mediat thonë se Dauti është kapur nga forcat e policisë në Mitrovicë.
Sipas Policisë, ditën e djeshme babai i të miturit ka bërë kallëzim, se djali i tij i kishte marrë makinën dhe ishte larguar në drejtim të paditur.
“Më datë 05.01.2026, në Komisariatin e Policisë Has, kanë bërë kallëzim familjarët e një shtetasi të mitur, 14 vjeç, banues në Has, se i mituri ka marrë pa leje automjetin e babait të tij dhe është larguar nga banesa. U bë shpallja në kërkim e 14-vjeçarit, ndërkohë shërbimet e Policisë po vijojnë kontrollet për gjetjen e tij”,- thuhej në njoftimin e Policisë.
Nuk dihet ende arsyeja e arratisjes së Dautit. Materialet proceduriale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës.
