Sekretari i Përgjithshëm i Kombeve të Bashkuara, Antonio Guterres, ka bërë një thirrje të fortë drejtuar liderëve botërorë, duke kërkuar që viti 2026 të shënojë një kthesë drejt paqes, drejtësisë dhe zhvillimit, në një kohë kur bota përballet me kriza të shumta.
Në një mesazh publik, Guterres paralajmëroi se konflikti, krizat klimatike dhe shkeljet e vazhdueshme të së drejtës ndërkombëtare po minojnë besimin e qytetarëve tek udhëheqësit e tyre.
“Bota ndodhet në një udhëkryq. Njerëzit po pyesin: A po dëgjojnë udhëheqësit? A janë të gatshëm të veprojnë?”, u shpreh ai.
Shefi i OKB-së theksoi se mbi një e katërta e popullsisë globale jeton aktualisht në zona të prekura nga konfliktet, duke e cilësuar këtë një alarm serioz për komunitetin ndërkombëtar.
Ai bëri thirrje që burimet të zhvendosen nga lufta drejt zhvillimit, duke theksuar se investimi në luftimin e varfërisë dhe ndërtimin e paqes është thelbësor për të ardhmen e njerëzimit.
“Në këtë Vit të Ri, duhet të vendosim qartë prioritetet tona. Një botë më e sigurt ndërtohet duke investuar tek njerëzit, jo tek shkatërrimi”, tha Guterres.
Duke iu drejtuar drejtpërdrejt udhëheqësve botërorë, ai shtoi: “Në vitin 2026, ju bëj thirrje të merrni përgjegjësi. Zgjidhni njerëzit dhe planetin, jo dhimbjen dhe konfliktin. Le të ngrihemi së bashku për drejtësi, njerëzim dhe paqe.”
