Qytetarët në Vlorë po zhvillojnë sot një protestë, pasi prej ditësh po përballen me mungesën e ujit të pijshëm.
Këtë të diel qytetarët të revoltuar ndërprenë shfaqen në teatrin “Petro Marko” duke kërkuar zgjidhjen për problemin e tyre.
Situata u tensionua mes protestuesve dhe forcave të policisë me këta të fundit që janë futur në Teatrin e Vlorës teksa raportohet se kanë shoqëruar disa persona.
Ndërsa vijojnë të qëndrojnë në shesh qytetarët kërkojnë që të plotësohen kërkesat e tyre.
Shumë prej protestuesve kanë qenë edhe emigrantë të cilët kanë shprehur shqetësimet e tyre pasi kanë theksuar se janë kthyer për të festuar, por janë përballur me këto problematika.
Qytetarët kanë paralajmëruar një tjetër protestë. Ata kanë njoftuar se do të protestojnë sërish nesër në orën 10:00, para ambienteve të Bashkisë.
Problemi i furnizimit me ujë ka qenë i pranishëm për banorët e qytetit ndër vite, por situata është përkeqësuar dukshëm kohët e fundit.
Linja kryesore e qytetit ka pësuar një dëmtim të rëndë dhe përpjekjet për riparim nuk kanë dhënë rezultat.
Qytetarët shprehen se nuk mund të lahen, nuk mund të përdorin tualetin dhe kërkojnë zgjidhje urgjente. Disa thonë se kanë fëmijë të vegjël dhe kanë nevojë për ujë. Një qytetar, duke mbajtur bidonin bosh lart, u shpreh: “Duam ujë!”.
Disa prej tyre kanë bllokuar Bulevardin “Ismail Qemali” për të tërhequr vëmendjen. “Duam ujë, nuk duam koncerte,” thanë qytetarët. Njëri prej tyre shtoi: “Jam emigrant, këtë rrugë e kam bllokuar edhe në 1997, tani po e bllokoj përsëri. Erdha me pushime dhe gjeta shtëpinë pa ujë. Në Itali nuk ndodh të mungojë uji qoftë edhe për një orë pa ujë. Është turp.”
