Në fshatin Grepllesh të Ndroqit, banorët po përballen prej vitesh me një problem serioz.
Fqinji Muharrem Rosa, i vendosur në zonë në vitin 2018, ka ndërtuar pa leje dhe ka hedhur inerte pikërisht mbi burimin e ujit të pijshëm, nga i cili furnizohet gjithë komuniteti.
“Ne kemi një burim uji ku mbush gjithë fshati. Këta zotërinj, sapo kanë ardhur në 2018, filluan gërmimet, duke gërmuar malin, e një pjesë e kanë hedhur këtu, një pjesë andej. Na kanë bllokuar ujin e pijshëm”, u shpreh një banore.
Dokumentet tregojnë, se IMT Tiranë e ka gjobitur Muharremin për ndërtim të paligjshëm dhe ka nxjerrë urdhër prishjeje, por vendimi nuk është zbatuar.
“Janë në dijeni të të gjithë këtij problemi, e kur vjen njëri nuk vjen tjetri, sepse e dinë”, tha një banor.
Ndërkohë, banorët rrëfejnë, se ai i ka dhunuar dhe kërcënuar, duke e bërë situatën të padurueshme.
“Babi im, para nja 2-3-4 vitesh, nuk e di, në një konflikt po me këtë banor, e heq nga dora ky personi këtu”, tha një banore.
“Ai doli aty ma futi një gur nga prapa në shpinë. Më ra dy-tre herë”, tha një banore tjetër.
Gazetari i “Stop” tentoi të kontaktonte me Muharrem Rosën, por ky i fundit nuk pranoi.
“Unë jam bashkë me avokatin, nuk jam i disponueshëm”, tha Rosa për gazetarin.
Administratori i Njësisë Ndroq, Xhavit Çeka, thotë, se rasti është trajtuar, por nuk ka ende asnjë zgjidhje, ndërsa burimi i ujit ndodhet në tokë-shtet dhe mbetet i bllokuar për banorët.
Administratori: Pas kërkesave të banorëve, ne në mënyrë institucionale kemi nisur të gjitha institucioneve për zhbllokimin e këtij burimi. Ky është burim i hershëm, shumë vjeçar. Edhe unë aty kam bërë shkollën se shkolla fillore aty ka qenë.
Gazetari: Dua të kuptoj, ky burim ka qenë në një tokë-shtet, apo në një tokë private?
Administratori: Kjo është një tokë shtet. Unë kam qenë gjithmonë entusiazt që do të zgjidhet sepse janë shumë banorë, janë mbi 20 e ca familje që e vuajnë këtë shqetësim. Një nga ata jam dhe unë, pavarësisht se jam në lagjen tjetër. Kthim përgjigje kemi pasur por deri më tani veprime konkrete jo.Tv Klan
