Një denoncim ka mbërritur në redaksinë e JOQ Albania nga një banor i Lagjes 13, në zonën e Plazhit në Durrës, i cili thotë se prej 5 ditësh pallati ku ai jeton ka mbetur plotësisht pa furnizim me ujë.
Sipas qytetarit, situata është bërë e padurueshme. Ai tregon se uji nuk vjen as me orar, ndërsa familjet janë detyruar të blejnë ujë në market jo vetëm për të pirë, por edhe për nevoja bazë të higjienës, përfshirë larjen.
“Nuk dimë më si të kujdesemi për fëmijët, të moshuarit dhe të sëmurët. Jemi në vitin 2026 dhe ende po luftojmë për një të drejtë elementare si uji. Është e tmerrshme që po blejmë ujë në supermarket edhe për t’u larë”, shkruan qytetari.
Banorët shprehen se mungesa e ujit prej pesë ditësh nuk është më një shqetësim i zakonshëm, por një emergjencë që prek drejtpërdrejt shëndetin dhe jetën e tyre të përditshme. Ata ngrenë pyetjen se ku janë institucionet përgjegjëse dhe pse askush nuk ka dhënë një shpjegim apo zgjidhje për këtë situatë.
Në kulmin e sezonit veror, kur Durrësi pret mijëra pushues dhe temperaturat janë të larta, është e papranueshme që banorët të mbeten pa një shërbim jetik për ditë me radhë.
