Tre persona janë arrestuar nga Policia në Vlorë, pasi akuzohen si protagonistë të ngjarjes së regjistruar në rrerrothullimin e Nartës, ku u dhunuan disa policë dhe drejtori i IMT-së.
Në pranga janë vënë Irfan Dalipaj 58 vjeç Drisild Dalipaj 27 vjeç dhe Fabio Dalipaj 23 vjeç (babai dhe 2 djemtë) të cilët akuzohen se kanë ushtruar dhunë fizike ndaj Drejtorit të Inspektoratit të Mbrojtjes së Territorit në Bashkinë Vlorë, shtetasit D. K., 33 vjeç.
Sherri nisi për shkak të operacionit të hapsirave publike, ku IMT kishte kërkuar të hiqej tenda elavazhit, ndërkohë që tre shtetasit e lartpërmendur kanë kundërshtuar dhe kanë dhunuar drejtorin e IMT-së.
Në këtë moment kanë ndërhyrë punonjës të policisë, të cilët gjithashtu janë dhunuar.
Gjatë përshkallëzimit të situatës, një prej punonjësve të Policisë ka qëlluar një herë në ajër me armën e shërbimit, me qëllim zbrapsjen e autorëve, pa shkaktuar asnjë lëndim. Punonjësit e Policisë të dëmtuar ndodhen aktualisht të shtruar në spital.
Ndërkohë, materialet procedurale i janë referuar Prokurorisë për veprime të mëtejshme ligjore.
