Autoritetet franceze kanë gjobitur platformën online Shein me 10 mijë euro për çdo shkelje, duke e detyruar të vendosë masa për verifikimin e moshës së klientëve për të gjitha produktet për të rritur që shiten në Francë.
Vendimi u mor nga një gjykatë në Paris, pas polemikave të forta që shpërthyen pasi në platformë u zbuluan kukulla seksi me tipare fëminore. Gjykata urdhëroi Shein të forcojë kontrollet për të parandaluar aksesin e të miturve në këto produkte.
Megjithatë, gjykata rrëzoi kërkesën e qeverisë franceze për pezullimin e aktivitetit të Shein për tre muaj, duke e cilësuar këtë masë si “joproporcionale”. Ky vendim lehtëson disi presionin me të cilin kompania po përballet në Francë.
Në një reagim zyrtar, një zëdhënës i Shein deklaroi se kompania e mirëpret vendimin dhe se do të vijojë bashkëpunimin me autoritetet franceze për të përmirësuar proceset e kontrollit. “Prioriteti ynë mbetet mbrojtja e konsumatorëve dhe respektimi i ligjeve lokale”, tha ai.
Shein ndodhet prej javësh në qendër të kritikave, pasi u zbulua se në platformën e saj shiteshin produkte të ndaluara, përfshirë armë dhe lodra seksuale që i ngjanin fëmijëve. Më 5 nëntor, qeveria franceze tentoi pa sukses të pezullonte aktivitetin e kompanisë, vetëm pak orë pasi Shein kishte hapur dyqanin e saj të parë fizik brenda BHV në Paris.
