Tensionet kanë vijuar në Kuvend gjatë seancës së sotme. Kreu i Partisë Demokratike, Sali Berisha, është futur live në Facebook nga salla e Kuvendit.
Gjatë transmetimit, Berisha tha se po qarkullojnë zëra se zv.kryeministrja Belinda Balluku është larguar nga vendi, duke akuzuar mazhorancën se po e mbron atë.
Ndërkohë referuar dosjes së fundit të zyrtarëve të AKSHI-t, ku SPAK e cilësoi si grup i strukturuar kriminal, Berisha iu drejtua mazhorancës duke i thënë që të sjellin dhe të arrestojnë Ergys Agasin.
“Shkoni, sillni Agasin këtu, terroristin, pengmarrësin. Sillni Agasin këtu. Shko, para se të uleni këtu, duhet të gjeni Agasin, terroristin. Shkoni dhe sillni Agasin këtu, pastaj të bëjmë Kuvend. Shkoni! Terroristin, pengmarrësin.
Shkoni sillni Agasin këtu. Të dashur qytetarë dhe qytetare, këtu po zhvillohet një betejë për ligjin, për Kushtetutën.
Këta fshehin pengmarrësin e dy qytetarëve, Ergys Agasin, thuhet se edhe Lubia ka marrë dhenë, nuk e kam të sigurt.
Por ne qëndrojmë këtu për interesat tuaja, ne qëndrojmë këtu për Kushtetutën, ne qëndrojmë këtu për ligjin.
Se këta e bëjnë vidh e ik, vidh e ik, vidh e ik. Jo dhe jo, vidh dhe ligj, vidh dhe ligj, ne këtë po përpiqemi t’u tregojmë këtyre. Agasin e ka fshehur Proda. Shkoni dhe sillni Agasin këtu,” tha Berisha
