Protesta e fermerëve në Bruksel u shndërrua në një situatë tensioni gjatë natës, kur pak para mesnatës më shumë se 100 traktorë bllokuan rrugën Rue de la Loi, përpara ndërtesave të Komisionit Evropian dhe Këshillit Evropian, duke befasuar autoritetet.
Sipas raportimeve të mediave belge, protesta erdhi si surprizë, pasi fermerët pritej të mbërrinin në kryeqytetin belg në orët e para të së enjtes. Megjithatë, rreth orës 23:00 me orën lokale, një kolonë e gjatë traktorësh përshkoi Rue de la Loi, një nga rrugët kryesore që kalon përpara institucioneve qendrore të Bashkimit Evropian.
Si pasojë, trafiku në zonë u ndërpre plotësisht, ndërsa rruga u nda praktikisht në dy pjesë. Autoritetet policore ndërmorën masa të shtuara sigurie për të kufizuar praninë e traktorëve dhe për të çbllokuar zonën.
Sipas burimeve, një pjesë e fermerëve kishin Sheshin e Luksemburgut si pikë takimi. Në vendngjarje u dislokua një prani e shtuar policore, e mbështetur edhe nga helikopterë, me qëllim parandalimin e përshkallëzimit të situatës dhe garantimin e sigurisë rreth ndërtesave të institucioneve evropiane.
