Një 38-vjeçar është arrestuar nga Policia e Tiranës pasi dyshohet se ka përplasur për vdekje me automjet një 19-vjeçar dhe më pas është larguar nga vendi i ngjarjes. Sipas njoftimit zyrtar është arrestuar F. M., 38 vjeç, banues në fshatin Nikël.
Ngjarja ka ndodhur më 13 dhjetor 2025, në aksin rrugor “Fushë Krujë – Ura e Gjolës”, ku si pasojë e aksidentit humbi jetën shtetasi I. L., 19 vjeç.
Nga hetimet rezultoi se drejtuesi i mjetit në momentin e aksidentit ishte 38-vjeçari F. M., dhe jo vëllai i tij, B. M., i cili fillimisht ishte arrestuar në flagrancë si autor i dyshuar.
“Specialistët e Komisariatit të Policisë Krujë ndaluan shtetasin F. M., 38 vjeç, banues në fshatin Nikël, për veprat penale “Shkelja e rregullave të qarkullimit rrugor”, “Largimi nga vendi i aksidentit” dhe “Veprime që pengojnë zbulimin e së vërtetës”.
Në vijim të veprimeve të thelluara hetimore të kryera në drejtimin e Prokurorisë, për dokumentimin e rrethanave të aksidentit të ndodhur më datë 13.12.2025, në aksin rrugor “Fushë Krujë-Ura e Gjolës”, rezultoi se drejtuesi i automjetit që ka aksidentuar me pasojë vdekjen, shtetasin I. L., 19 vjeç, ka qenë shtetasi F. M. dhe jo vëllai i tij, shtetasi B. M., i cili u arrestua në flagrancë pas aksidentit, si autor i dyshuar. Automjeti është sekuestruar në cilësinë e provës materiale.”, njofton policia.
