Kreu i Partisë Demokratike, Sali Berisha ka deklaruar mbrëmjen e sotme, te protesta e kryeministrisë se, Edi Rama është hajduti numër 1 i vendit dhe se ky i fundit vjedh se s’ka kush e ndalon.
Berisha thotë se Rama vjedh shqiptarët ditë e natë ndërsa është shprehur se “Ai i bën të gjitha këto vetëm për shkakun tonë, se e lejojmë ne”.
Sa i takon largimit me forcë të protestuesve të Adriatik Lapajt nga sheshi i Kryeministrisë, për ti hapur vendin protestës së opozitës, Berisha thotë se ky veprim ka ardhur sipas tij pasi Edi Rama ka frikë nga revolta qytetare.
“Miqtë e mi, parafolësit këtu theksuan se Edi Rama është një hajdut i papërmbajtur, por në të gjitha ligësitë e njeriut, ajo që shterron guximin më shumë është vjedhja. Ndaj dhe Edi Rama është frikacaku më i madh që ka njohur Shqipëria në atë detyrë. Vetëm një moment, shikoni se ç’bën çdo natë me Adriatik Lapajn, në protestën e tij më qytetare, më civile. Vë një karrige aty, disa mjete dhe proteston në emër të çdo qytetari. Çdo ditë, me orë të tëra policia, banditët ua heqin çadrat, u heqin tavolinat, u heqin ujin me akte banditeske. Pse kjo?
Sepse ai është kryefrikacaku i kombit. Kryehajduti është edhe kryefrikacaku i kombit. Dhe u garantoj unë se ai është aty, se ai vjedh shqiptarët ditë e natë, nuk ngopet kurrë. Ai i bën të gjitha këto vetëm për shkakun tonë, se e lejojmë ne”,- është shprehur Berisha.
