Detaje të reja kanë dalë në dritë nga pengmarrja e 29-vjeçarit kosovar, Fisnik Xhaka, i cili dyshohet se ishte përfshirë si ndërmjetës në një marrëveshje për trafik droge me persona jashtë Shqipërisë. Për këtë ngjarje janë arrestuar tre të rinj nga Vlora – Vilson Agaj, Orest Çorapaj dhe Julian Zogaj.
Sipas raportimeve, Xhaka kishte dalë garant për tre të arrestuarit, duke siguruar që një sasi droge me vlerë rreth 70 mijë euro të dërgohej në një vend të Bashkimit Europian pa pagesë paraprake. Marrëveshja parashikonte që paratë të ktheheshin më vonë, por kjo nuk ndodhi kurrë, duke shkaktuar konfliktin që çoi në pengmarrje.
I riu nga Kosova u mbajt peng për rreth dy javë, gjatë të cilave dyshohet se ka pësuar dhunë fizike. Ngjarja u zbulua pas denoncimit të motrës së tij, që jeton në Suedi, e cila njoftoi Interpolin, duke bërë të mundur bashkëpunimin me Policinë e Vlorës. Pas sinjalizimit, autoritetet lokalizuan banesën dhe arrestuan tre autorët brenda 15 minutash.
