Policia ka zbardhur ngjarjen e ndodhur më 6 dhjetor te rrethrrotullimi i zonës së Freskut, ku një 26-vjeçar u plagos rëndë me sende të forta.
Tre persona ishin të përfshirë në këtë ngjarje: dy që porositën sulmin dhe një që e kreu atë.
Autori i plagosjes, 49-vjeçari H. M., është arrestuar, ndërsa po punohet për kapjen e dy personave të tjerë, 36-vjeçarit Gj. N. dhe 30-vjeçarit Xh. U. Të tre kanë precedentë penalë për krime kundër personit, ndërsa i arrestuari ka edhe precedent për armëmbajtje pa leje.
Një tjetër person, 33-vjeçari T. D., po procedohet në gjendje të lirë, pasi dyshohet se ka shoqëruar autorin e krimit dhe nuk ka dhënë informacion për ngjarjen në polici.
Nga këto veprime rezultoi se 36-vjeçari dhe 30-vjeçari, për motive të dobëta, kanë porositur shtetasin H. M., për të kryer plagosjen.
Në vijim të veprimeve operacionale, 49-vjeçari u kap dhe u vu në pranga, ndërkaq po punohet për kapjen e shtetasve Gj. N. dhe Xh. U., si dhe për identifikimin dhe kapjen e shtetasve të tjerë që dyshohet se janë përfshirë në plagosjen e 26-vjeçarit.
Gjithashtu, nisi procedimi në gjendje të lirë për shtetasin T. D., 33 vjeç, pasi dyshohet se ka shoqëruar shtetasin H. M., për të kryer krimin, si dhe ka refuzuar të deklarojë në polici, rrethana të kësaj ngjarjeje, për të cilat dyshohet se ka patur dijeni.”– njofton policia.
Materialet procedurale iu referuan Prokurorisë së Tiranës, për veprime të mëtejshme.
