Kreu i grupit parlamentar demokrat, Gazment Bardhi, ka zhvilluar takime me përfaqësues republikanë dhe demokratë në Capitol Hill, gjatë vizitës së tij në Washington.
Lajmin e ka bërë të ditur vetë Bardhi përmes një postimi në rrjetet sociale.
Ai u shpreh se vizitat në Kongresin Amerikan mbeten gjithmonë një mundësi e rëndësishme për të diskutuar mbi bashkëpunimin mes dy vendeve dhe rolin e SHBA-së në çështjet globale.
“Është gjithmonë kënaqësi të jesh në Kongresin Amerikan, ku kisha mundësi të diskutoja me përfaqësues republikan dhe demokrat,” shkroi Bardhi.
Në mesazhin e tij, ai theksoi se Shtetet e Bashkuara mbeten një faktor kyç në garantimin e paqes, sigurisë dhe demokracisë në botë, ndërsa nënvizoi se Shqipëria është krenare për aleancën e fortë me SHBA-në.
“SHBA mbetet lider botëror në garantimin e paqes, sigurisë dhe demokracisë në botë. Shqipëria është krenare që ka një aleat të çmuar si SHBA,” deklaroi Bardhi.
