Një zbulim tronditës ka tronditur Australinë, pasi policia gjeti eshtrat e një fëmije 18-muajsh me origjinë shqiptare, të varrosur në një varr të cekët në oborrin e një shtëpie në zonën Brookfield, në veriperëndim të Melburnit.
Sipas raportimeve të mediave australiane, policia nisi gërmimet të hënën, pas informacioneve të marra në lidhje me një zhdukje të dyshimtë. Pas gjashtë orësh kërkime, hetuesit gjetën trupin e fëmijës, i cili ishte varrosur vetëm 50 centimetra nën tokë.
Ekspertët dyshojnë se eshtrat mund të kenë qenë aty për më shumë se një dekadë, ndërsa identiteti i saktë i viktimës dhe rrethanat e ngjarjes janë ende nën hetim.
Mediat vendase raportojnë se fëmija kishte jetuar në atë shtëpi në vitin 2014, bashkë me prindërit dhe dy vëllezërit e motrat e tij, përpara se familja të kthehej jashtë Australisë, ndoshta në Shqipëri. Ai nuk ishte raportuar i zhdukur në atë periudhë.
Pronari aktual i banesës, i cili është i palidhur me familjen, ka thënë për 7News se zbulimi e ka tronditur thellë.
“Diçka e tillë nuk duhet të ndodhë, por ka ndodhur 14 vjet më parë. Shumë e keqe. Shumë e tmerrshme,” – deklaroi ai.
Policia australiane po vijon hetimet për të përcaktuar shkakun e vdekjes dhe nëse ngjarja lidhet me ndonjë akt kriminal, ndërsa është duke kontaktuar edhe me autoritetet shqiptare për të verifikuar gjurmët e familjes së fëmijës.
