Një 39-vjeçar shqiptar, i konsideruar si drejtues i një organizate kriminale ndërkombëtare të trafikut të kokainës, u arrestua sot në Athinë nga policia greke.
Ai ishte shpallur në kërkim ndërkombëtar nga autoritetet belge, të cilët lëshuan një Njoftim të Kuq të Interpolit lidhur me transportin e mbi 1.200 kilogramëve kokainë nga Amerika e Jugut drejt Evropës dhe më tej në Rusi.
Sipas hetimeve, rrjeti operonte me kontejnerë të nisur nga Ekuadori, përdorte portin e Antverpit dhe magazina si “shtëpi të sigurta”, dhe kishte komunikime të përgjuara që zbuluan strukturën e organizatës. Autoritetet belge thanë se pjesa më e madhe e drogës kishte kaluar përmes Belgjikës, Spanjës, Greqisë dhe Shqipërisë, duke krijuar një rrjet logjistik ndërkontinental.
Policia greke njoftoi se arrestimi i shqiptarit lidhet edhe me sekuestrimin e një kontejneri në portin e Antverpit në shtator 2024, që përmbante 500 kg kokainë. I arrestuari u dërgua në Prokurorinë kompetente, ndërsa hetimet vazhdojnë.
Avokati i mbrojtjes, Sakis Kechagioglou, e përshkroi rastin si një nga më kompleksët e trafikut ndërkombëtar të kokainës në Evropë dhe nënvizoi rëndësinë e zgjedhjes së juridiksionit të gjykimit për të përcaktuar fatin penal të klientit të tij.
