Mbrojtja e kryebashkiakut të Tiranës, Erjon Veliaj, ka dorëzuar në Gjykatën Kushtetuese një kërkesë për shfuqizimin e vendimit të gjykatës për arrest me burg ndaj tij.
Sipas një burimi pranë gjykatës, avokatët e Veliajt kanë argumentuar se këto vendime janë antikushtetuese dhe jo proporcionale.
Në kërkesën e tyre, ata theksojnë se edhe raportet e Komisionit Europian evidentojnë rrethanat që bëjnë të domosdoshme mbrojtjen e funksionarëve të lartë të pushtetit lokal nga pranga. Kjo kërkesë është dorëzuar sot dhe pritet një përgjigje nga gjykata.
Kujtojmë se Veliaj u arrestua më 10 shkurt të këtij viti nga SPAK në kuadër të hetimeve për korrupsion dhe pastrim parash. Në dosjen ndaj tij janë në total 29 të pandehur ku krahas kryebashkiakut të Tiranës është edhe bashkëshortja e tij Ajola Xoxa dhe disa përfaqësues të kompanive private dhe organizatave jofitimrurëse.
Ndaj Veliajt janë ngritur akuzat korrupsion pasiv në 9 raste, pastrim parash, mosdeklarim pasurie dhe fshehje të të ardhurave, shpërdorim detyre, si dhe futje e sendeve të ndaluara në qeli.
Aktualisht çështja ndaj tij është në seancë paraprake dhe pritet të vendoset nëse gjykata do të pranojë çështjen ndaj tij për gjykim të plotë.
Më 3 nëntor, Gjykata Kushtetuese la në detyrë Erion Veliajn duke shpallur të paligjshëm shkarkimin e tij nga Këshilli Bashkiak i Tiranës dhe më pas nga Këshilli i Ministrave. Sipas gjykatës, ai nuk ka kryer shkelje të rëndë pasi mungesa e tij në detyrë lidhet me arrestimin dhe jo me neglizhencë apo abuzim.
