Kreu i Grupit Parlamentar të PD, Gazment Bardhi ka reaguar pas deklaratave të Ramës i cili mori në mbrojtje Belinda Ballukun dhe dërgoi në Gjykatën kushtetuese pezullimin e saj nga detyra.
Sipas Bardhit, Balluku e ka ulur në gjunjë kryeministrin Rama dhe e shantazhon atë.
Bardhi thotë se Rama është zyrtarisht avokati i një të pandehure teksa shtoi se ky i fundit nuk e shkarkon dot Ballukun pasi është dhe vetë i përfshirë në afera.
“Edhe pas vendimit të Gjykatës së Posaçme për të pezulluar zëvendës kryeministren dhe ministren e infrastrukturës dhe energjisë Belinda Balluku, kryeministri nuk u ngrit në lartësinë e një kryeministri europian dhe të shkarkonte të pandehurën nga prokuroria e posaçme. Ka një arsye pse Edi Rama nuk mundet ta bëjë këtë. Belinda Balluku e ka ulur në gjunjë dhe e shantazhon me aferat e përbashkëta të abuzimit me pushtetin.
Pra sot kemi një lajm të keq. Një vend, në vend që të mbrojë interesat e shqiptarëve, Edi Rama, kryeministri i vendit zyrtarisht është avokati i një të pandehur për abuzime miliona euro me tenderat publikë. Pse nuk ka fuqi Edi Rama që të shkarkojë Belinda Ballukun, por sfidon drejtësinë, sfidon shqiptarët dhe përbuz parimet themelore të çdo vendi demokratik perëndimor. Përgjigja është vetëm një. Ai është në krye të çdo afere korruptive në këtë vend. Edi Rama dhe Belinda Balluku janë bashkë në aferën e tunelit të Llogarasë.
Kompaninë fituese të tunelit të Llogarasë nuk e përcaktoi apo paracaktoi Belinda Balluku, por e paracaktoi Edi Rama dhe Belinda Balluku. Dhe siç ndodhen mesazhet e Belindës në telefonin e Evis Berberit për zbatimin e një urdhri të kundraligjshëm të shefit të saj, ashtu ndodhen edhe mesazhet e Edi Ramës në telefonin e Belinda Ballukut. Kjo është fotografia e datës 3 qershor 2021, fiks tre muaj përpara se të hapej gara për tunelin e Llogarasë, që përcakton qartë se Edi Rama ka dalë dhe paracaktuar bashkë me Belindën e tij kompaninë fituese të tunelit të Llogarasë duke i dhënë 50 milionë më shumë sesa ç’ishte oferta gjatë garës së parë të anulluar. Kjo nuk bën vaki në asnjë vend të Europës, që kryeministri dhe zëvendësja e tij të pozojnë me kompanitë e paracaktuara përpara se të hapin garën duke shkelur konkurrencën e lirë”,- shprehet Bardhi.
