Kreu i Partisë Demokratike, Sali Berisha, në një konferencë për shtyp ditën e premte, iu kthye ligjit për barazinë gjinore.
Berisha e quajti këtë ligj të miratuar nga socialistët si “kazmë në themel të shtyllës më kryesore të ekzistencës së kombit shqiptar”.
“Duhet të rikthehem edhe njëherë te ligji që i vuri kazmën në themel shtyllës më kryesore të ekzistencës së kombit shqiptar, që është familja,” deklaroi Berisha.
Ai theksoi se familja shqiptare ka qenë baza e mbijetesës së kombit në kushtet më të vështira historike.
Berisha krahasoi vendimin e Parlamentit shqiptar me atë të Gjykatës Supreme të SHBA, e cila sipas tij, ka sanksionuar vetëm dy gjini – mashkull dhe femër – duke përjashtuar njohjen e çdo gjinie tjetër.
“Në Parlamentin e dhunës, të votës së vjedhur, votohet ligji në të cilin gjinia zëvendësohet me përkatësinë e shumëfishtë gjinore,” tha ai, duke kritikuar përfshirjen e identitetit gjinor me diversitet të gjerë në ligj.
Sipas Berishës, miratimi i ligjit u bë në mënyrë të fshehtë dhe pa debat publik, në kundërshtim me marrëveshjen e arritur që diskutimi të zhvillohej në një orar të përshtatshëm për qytetarët.
Ai akuzoi mazhorancën se e votoi ligjin në orët e vona të natës, pasi kuptoi se nuk mund ta mbronte publikisht.
“Vendosën ta votojnë pa debat, morën pushim gjersa i mblodhën në të katër anët deputetët që nuk i kishin dhe realizuan votimin siç e patë mbrëmë,” tha Berisha gjatë konferencës për shtyp.
