Deputetja e Partisë Demokratike, Jorida Tabaku, ka kritikuar qeverinë shqiptare gjatë fjalës së saj në Kuvend, duke komentuar Progres Raportin e Komisionit Europian për Shqipërinë.
Sipas saj, raporti konfirmon shqetësimet e opozitës për zgjedhje jo të lira, politizim të administratës publike dhe dobësi të institucioneve demokratike.
Tabaku theksoi se Shqipëria ka nevojë për 53 vjet për të plotësuar standardet ekonomike, 79 vjet për ato sociale dhe mbi 1000 vjet për standardet mjedisore, të bujqësisë dhe peshkimit, nëse vazhdohet me ritmin aktual të qeverisjes.
Deputetja kritikoi gjithashtu funksionimin e Parlamentit dhe administratës publike, duke theksuar mungesën e kontrollit mbi qeverinë, bllokimin e komisioneve hetimore dhe politizimin e administratës. “Administrata publike sot nuk është administratë shtetërore, por e partisë,” u shpreh ajo.
‘Si pak raste më parë, ashtu siç do të kemi një debat njëkohësisht edhe për procesin e ODIR-it. Po ajo që duhet të bëjmë ne, jo vetëm në këtë sallë, po dhe jashtë salle, është që ta kthejmë këtë proces në një prioritet kombëtar. Të diskutojmë dhe ta përfundojmë edhe diskutimin e Progres Raportit me një rezolutë të përbashkët, të marrim hapa, të ndajmë punën për komisionet parlamentare dhe njëkohësisht të shohim se si ky mund të bashkërendohet edhe me procesin e buxhetit,’ tha ajo.
